Պենտագոնը կոչ է արել քաղաքացիական անձանց անհապաղ լքել Իրանի նավահանգիստները Հորմուզի նեղուցի գոտում

Մարտի 11-ին ԱՄՆ կենտրոնական հրամանատարությունը (CENTCOM) հրատապ նախազգուշացում է տարածել Իրանի քաղաքացիական բնակչությանը՝ կոչ անելով նրանց անհապաղ լքել Հորմուզի նեղուցի բոլոր նավահանգստային կառույցները, որտեղ տեղակայված են իրանական ռազմածովային ուժերը։

ԱՄՆ զինված ուժերի տվյալներով՝ Թեհրանը քաղաքացիական նավահանգստային ենթակառուցվածքներն օգտագործում է միջազգային նավագնացությանը սպառնացող գործողություններ իրականացնելու համար՝ վտանգելով քաղաքացիական բնակչության կյանքը։

CENTCOM-ն ընդգծել է, որ նման գործողությունները նավահանգիստներին զրկում են իրենց պաշտպանված կարգավիճակից և դրանք դարձնում են օրինական ռազմական թիրախներ։

Իրանցի նավահանգստային աշխատողներին, վարչական անձնակազմին և առևտրային նավերի անձնակազմերին խորհուրդ է տրվել հեռու մնալ ռազմական նավերից և տեխնիկայից՝ հնարավոր հետևանքներից խուսափելու համար։