Պուտինն ու Լուկաշենկոն ԵԱՏՄ առաջնորդների հանդիպմանը քննարկել են Հայաստանի թեման. Պեսկով
ՌԴ նախագահ Վլադիմիր Պուտինը և Բելառուսի նախագահ Ալեքսանդր Լուկաշենկոն Աստանայում ԵԱՏՄ առաջնորդների հանդիպման շրջանակներում մտքեր են փոխանակել Հայաստանի շուրջ ստեղծված իրավիճակի վերաբերյալ՝ կարճ զրույց ունենալով:
Այս մասին հայտնել է Ռուսաստանի ղեկավարի մամուլի քարտուղար Դմիտրի Պեսկովը, հաղորդում է «ՌԻԱ Նովոստի»-ն:
«Նրանք հենց գագաթնաժողովի շրջանակում մի քանի անգամ զրուցել են։ Հայաստանի վերաբերյալ մտքերի կարճատև փոխանակում եղել է, բայց առարկայական խոսակցություն չի եղել, որովհետև ուղղակի ժամանակ չի եղել»,- ասել է Պեսկովը լրագրողներին՝ պատասխանելով այն հարցին, թե արդյոք Պուտինի և Լուկաշենկոյի զրույցներում բարձրացվե՞լ է Հայաստանի թեման։
«Բայց միևնույն ժամանակ, ոչ պաշտոնական ճաշի ընթացքում նրանք հնարավորություն են ունեցել բոլորով միասին շատ լավ խոսել, բավականին երկար շփում է եղել»,- հավելել է նա։
