Աննա Մարտիկյանը հյուրընկալել է ՀՀ-ում ՌԴ արտակարգ եվ  լիազոր դեսպան Սերգեյ Կոպիրկինին

Շիրակի մարզպետի տեղակալ Աննա Մարտիկյանն աշխատակազմի պատասխանատուների հետ այսօր հյուրընկալել է Հայաստանի Հանրապետությունում Ռուսաստանի Դաշնության արտակարգ և լիազոր դեսպան Սերգեյ Կոպիրկինի գլխավորած պատվիրակությանը։

Այս մասին  Petutyun.com–ին  տեղեցնում են Շիրակի մարզպետի  աշխատակազմի մամուլի ծառայությունից։

Շիրակի մարզպետ Մուշեղ Մուրադյանի անունից ողջունելով հյուրերին՝ մարզպետի տեղակալը անդրադարձել է համագործակցության ամրապնդմանը․ «Ուզում եմ փոխանցել Շիրակի մարզպետ Մուշեղ Մուրադյանի ողջույնները։ Մարզպետի անունից ուզում եմ նշել, որ Շիրակի մարզպետի աշխատակազմը պատրաստ է ապակենտրոնացված համագործակցության, մինչ այժմ ձևավորվել են բարիդրացիական լուրջ հարաբերություններ և այդ բարեկամական փոխգործակցության արդյունքում իրականացվել են տարբեր ծրագրեր։ Այսուհետ ևս մենք պատրաստ ենք դրանց ամրապնդմանը միտված նախաձեռնությունների իրականացման»։

Դեսպանը շնորհակալություն է հայտնել Աննա Մարտիկյանին ջերմ ընդունելության համար և նշել, որ չնայած բարդ ժամանակաշրջան է երկու երկրների համար, սակայն վստահ է, որ հայ-ռուսական դարավոր բարեկամությունը անխախտ է մնալու։

Հանդիպման ժամանակ անդրադարձ է կատարվել փոխադարձ հետաքրքրություն ներկայացնող մի շարք բնագավառներում համագործակցությանը, մասնավորապես կրթական, մարզական նախաձեռնություններին։