Ուշադիր հետեվում ենք խաղաղության հաստատման ուղղությամբ Հայաստանի անկեղծ ջանքերին. Էրդողան
Թուրքիայի նախագահ Ռեջեփ Թայիփ Էրդողանը նախագահական համալիրում կառավարության նիստից հետո հայտարարություններ է արել։
Նա ընդգծել է, որ Թուրքիան գործում է՝ ելնելով սեփական ազգային շահերից և զարգացնում է համագործակցությունը այն ոլորտներում, որոնք համապատասխանում են երկրի շահերին։
Ելույթի ընթացքում երկրի ղեկավարը հատուկ ուշադրություն է դարձրել Հարավային Կովկասում տիրող իրավիճակին։
Ինչպես հայտնի է, հոկտեմբերի 18-ին Թուրքիան ընդունել է Հայաստանի, Ադրբեջանի, Ռուսաստանի և Իրանի արտաքին գործերի նախարարներին՝ տարածաշրջանային «3+3» հարթակի հանդիպման շրջանակներում։
«Մենք տեսնում ենք, որ այս հարթակը բավարարում է կարևոր կարիքները: Մենք ձգտում ենք նրան ինստիտուցիոնալ բնույթ տալ»,- ասել է Էրդողանը։
Նրա խոսքով՝ այժմ «եզակի հնարավորություն» է բացվել Հարավային Կովկասում կայուն խաղաղություն հաստատելու համար։
«Մենք ուշադիր հետևում ենք այդ ուղղությամբ եղբայրական Ադրբեջանի և Հայաստանի անկեղծ ջանքերին։ Սա աննախադեպ ժամանակ է կայուն խաղաղության հասնելու համար: Մենք կշարունակենք աշխատել ադրբեջանցի եղբայրների հետ համակարգված»,- ընդգծել է Թուրքիայի ղեկավարը։
