Պուտինը մտադիր է հանդիպել Ասադի հետ, սակայն ճշգրիտ ժամանակը դեռ հայտնի չէ
Ռուսաստանի նախագահ Վլադիմիր Պուտինը մտադիր է հանդիպել Սիրիայի նախկին նախագահ Բաշար ալ Ասադի հետ, հայտարարել է ՌԴ նախագահի միջազգային հարցերով օգնական Յուրի Ուշակովը։
Նրա խոսքով՝ ծրագրված հանդիպման ստույգ ժամկետն անհայտ է։ Այս մասին գրում է ՌԻԱ «Նովոստի»-ն:
«ՌԴ նախագահը վերջերս ուղիղ կապի ժամանակ նշեց, որ մտադիր է հանդիպել Ասադի հետ։
Բայց երբ նա կհանդիպի, ես անկեղծորեն չգիտեմ:
Բայց քանի որ նա ասել է, հավանաբար նման հանդիպում կանցկացնի»,- ասել է Ուշակովը։
Ուշակովը հավելել է, որ ռուսական կողմը կապ է պահպանում Սիրիայի նոր իշխանությունների հետ։
Նրա խոսքով՝ Մոսկվան կապեր է հաստատել Դամասկոսի հետ ինչպես դիվանագիտական, այնպես էլ ռազմական առումներով։
