Նարեկ Մկրտչյանն այցելել է Շիրակի մարզ, եղել ԱՍՀ նախարարության ենթակայությամբ գործող խնամքի հաստատություններում
ՀՀ աշխատանքի և սոցիալական հարցերի նախարար Նարեկ Մկրտչյանը Շիրակի մարզպետի տեղակալ Արտուշ Հովհաննիսյանի, Գյումրու քաղաքապետի պաշտոնակատար Սարիկ Մինասյանի հետ այցելել է նախարարության ենթակայությամբ գործող խնամքի հաստատություններ։
Ինչպես հայտնում են նախարարությունից, վերջիններս նախ եղել են Հայկական կարմիր խաչի ընկերության Գյումրու շուրջօրյա խնամքի կենտրոնում, ծանոթացել ավարտական փուլում գտնվող շինարարական աշխատանքներին, շփվել հաստատությունում խնամք ստացող ավագ սերնդի ներկայացուցիչների հետ, պատասխանել նրանց հետաքրքրող հարցերին։
Նարեկ Մկրտչյանը, Արտուշ Հովհաննիսյանն ու Սարիկ Մինասյանը եղել են Գյումրիում գործող, երեխաներին խնամք մատուցող երկու հաստատություններում՝ Գյումրու «Երեխաների տանը» և «Շիրակի մարզի երեխայի և ընտանիքի աջակցության կենտրոնում»։
Շրջայցերի ընթացքում վերջիններս հանդիպել են երեխաներին, մասնագետների հետ քննարկել ծառայությունների մատուցմանը վերաբերող մի շարք հարցեր:
