2015-ին կնքված միջուկային գործարքն Իրանի համար այլեվս կենսունակ չէ. Արաղչի

Իրանի արտաքին գործերի նախարար Աբբաս Արաղչին իրանական Khabar-e Online-ին տված հարցազրույցում ասել է, որ Գործողությունների համատեղ համապարփակ ծրագիրը (ԳՀՀԾ), որը հայտնի է նաև որպես միջուկային գործարք, չի կարող վերագործարկվել ներկայիս տեսքով։

Նրա խոսքով՝ Իրանը չի կարող վերադառնալ համաձայնագրի պայմաններին, քանի որ երկիրն այդ պայմանագրի կնքումից ի վեր միջուկային ոլորտում զգալի առաջընթաց է գրանցել:

Այս մասին գրում է iranintl.com-ը:

«ԳՀՀԾ-ն իր ներկայիս տեսքով և ձևով մեզ համար կենսունակ չէ։

Մեր վիճակը էապես փոխվել է, և մենք չենք կարող վերադառնալ նախկին պայմաններին»,- ասել է պաշտոնյան։

Միջուկային համաձայնագիրը, որը ստորագրվել է 2015 թվականին Մեծ Բրիտանիայի, Գերմանիայի, Չինաստանի, Ռուսաստանի, ԱՄՆ-ի, Ֆրանսիայի և Իրանի կողմից, նախատեսում էր Թեհրանի նկատմամբ պատժամիջոցների վերացում՝ նրա միջուկային ծրագրի սահմանափակումների դիմաց։

Սակայն 2018 թվականի մայիսին ԱՄՆ նախագահ Դոնալդ Թրամփը հայտնել է, որ իր երկիրը դուրս է գալիս այս համաձայնագրից և վերականգնում է Իրանի դեմ պատժամիջոցները։

Ի պատասխան՝ Թեհրանը աստիճանաբար նվազեցրել է իր պարտավորությունները ԳՀՀԾ-ի շրջանակում՝ հրաժարվելով միջուկային հետազոտությունների և ուրանի հարստացման մակարդակի սահմանափակումներից։