ՀԲ կողմից ֆինանսավորվող «Ջրային և ոռոգման ծառայությունների բարելավում» ծրագրին վերաբերող հարցեր են քննարկվել
ՀՀ տարածքային կառավարման և ենթակառուցվածքների նախարարի տեղակալ Վարդան Կոստանյանը ընդունել է Համաշխարհային բանկի ջրային ռեսուրսների կառավարման ավագ մասնագետ Ռանու Սինհանի գլխավորած պատվիրակությանը։
Հանդիպմանը ներկա են եղել նաև Ջրային կոմիտեի նախագահի ժամանակավոր պաշտոնակատար Մարտիրոս Նալբանդյանը, նախագահի տեղակալ Վարազդատ Մկրտչյանը, Համաշխարհային բանկի գյուղատնտեսության ոլորտի ավագ մասնագետ Արուսյակ Ալավերդյանը, Ջրամատակարարման և ջրահեռացման մասնագետ Սվեն Շլումպբերգերը և ոլորտային այլ մասնագետներ։
Հանդիպման ընթացքում քննարկվել են Համաշխարհային բանկի կողմից ֆինանսավորվող «Ջրային և ոռոգման ծառայությունների բարելավում» (ՋՈԾԲ/WISE) ծրագրին վերաբերող հարցեր, հստակեցվել են ծրագրի հիմնական դրույթները գործողությունների, ծախսերի և ժամկետների վերաբերյալ։
Ծրագրի առանցքային նպատակն է ջրային ոլորտի բարեփոխումների իրականացումը, ռազմավարությունների մշակումը, ոռոգման և գյուղական ջրամատակարարման ու ջրահեռացման բարելավումը և ոռոգման ենթակառուցվածքների ու համակարգերի կառավարման արդիականացումը։
