Պուտինը Լավրովին պարգևատրել է Ռուսաստանի բարձրագույն պետական պարգևով
ՌԴ նախագահ Վլադիմիր Պուտինը Արտաքին գործերի նախարար Սերգեյ Լավրովին պարգևատրել է երկրի բարձրագույն պետական պարգևով՝ Սուրբ Անդրեաս Առաջին կոչված շքանշանով։
Լավրովը պարգևատրվել է «Հայրենիքին մատուցած ակնառու ծառայությունների, Ռուսաստանի արտաքին քաղաքականության զարգացման և իրականացման գործում մեծ ավանդի, ինչպես նաև կառավարության երկարամյա արդյունավետ գործունեության համար» շքանշանով։
«Ինձ համար մեծ պատիվ է ստանալ այս մրցանակը ձեր ձեռքից: Չեմ ուզում ֆորմալ հնչի, բայց կասեմ ի սրտե. Ձեր այս որոշումն ընկալում եմ որպես մեր ամբողջ թիմի աշխատանքի գնահատականը արտաքին քաղաքականության ուղղությամբ ձեր առաջադրած խնդիրների իրականացման գործում, որտեղ, առանց չափազանցության, կա պայքար բարու և չարի միջև», — ասել է Լավրովը Պուտինի պարգևը ստանալուց հետո:
Լավրովին «Սուրբ Անդրեաս Առաջին» շքանշանով պարգևատրելու մասին հրամանագիրը հրապարակվել է մարտի 21-ին՝ ԱԳ նախարարի ծննդյան օրը։ Այդ ժամանակ նա 75 տարեկան էր։
Հարկ է նշել, որ Սուրբ Անդրեաս Առաջին կոչվածի շքանշանը Ռուսաստանի բարձրագույն պետական պարգևն է։ Այն շնորհվում է ականավոր պետական և հասարակական գործիչներին և Ռուսաստանի Դաշնության այլ քաղաքացիների բացառիկ ծառայությունների համար, որոնք նպաստում են Ռուսաստանի բարգավաճմանը, մեծությանը և փառքին, ինչպես նաև օտարերկրյա կառավարությունների ղեկավարներին և առաջնորդներին՝ Ռուսաստանի Դաշնությանը մատուցած ակնառու ծառայությունների համար:
Շքանշանը ստեղծվել է 1699 թվականին Պետրոս I-ի կողմից և մինչև 1714 թվականին Սուրբ Եկատերինայի շքանշանի ստեղծումը Ռուսաստանի ցարդության միակ շքանշանն էր։ Շքանշանի առաջին ասպետը եղել է դիվանագետ Ֆյոդոր Գոլովինը 1699 թվականին։ Այն համարվում էր Ռուսական կայսրության բարձրագույն շքանշանը մինչև 1917 թվականը։ 1998 թվականին շքանշանը վերականգնվեց որպես Ռուսաստանի Դաշնության բարձրագույն պարգև։
Նախկինում Սուրբ Անդրեաս Առաքյալի շքանշանով պարգևատրվել են Բելառուսի նախագահ Ալեքսանդր Լուկաշենկոն և Հնդկաստանի վարչապետ Նարենդրա Մոդին Ռուսաստանի հետ դաշինքի և ռազմավարական գործընկերության զարգացման գործում մատուցած ծառայությունների համար։
Նաև բարձրագույն պետական պարգևը ստացել է Թաթարստանի պետական խորհրդական Մինտիմեր Շայմիևը 2023 թվականին՝ «ռուսական պետականության և դաշնայնության ամրապնդման, Թաթարստանի սոցիալ-տնտեսական զարգացման մեջ ազգամիջյան ներդաշնակության համար ծառայությունների համար»։
