Եթե լսեք արտապատվիրակում, միշտ իմացեք՝ դա քննարկվում է ՀՀ ամբողջականության, ինքնիշխանության, իրավազորության համատեքստում. Փաշինյան
Մենք 2022 թվականին հրապարակային առաջարկություն ենք արել, որ պատրաստ ենք կիրառել front office, back office տարբերակը, որը աշխարհում կիրառվող տարբերակ է:
Կան երկրներ, որոնք իրենց սահմանային և մաքսային ծառայությունները արտապատվիրակում են այդ ոլորտում գործունեություն ծավալող կամ պրոֆեսիոնալ, կամ միջազգային պրոֆեսիոնալ կազմակերպությունների:
Այդ մասին ասուլիսի ժամանակ ասաց ՀՀ վարչապետ Նիկոլ Փաշինյանը:
«Այն ժամանակ մենք այդ առաջարկությունները արել ենք, բայց վերջին շրջանում նման առաջարկ չի քննարկվել:
Վերջին շրջանի քննարկումներում նման հարց ընդհանրապես չի քննարկվել, կամ առնվազն եթե լինի հետաքրքրություն նման տարբերակի վերաբերյալ, մենք էլի պատրաստ ենք քննարկել:
Լսեք արտապատվիրակում, լսեք front office, back office, լսեք մի որևէ այլ բան, միշտ իմացեք, որ դա քննարկվում է ՀՀ տարածքային ամբողջականության, իրավազորության, ինքնիշխանության համատեքստում: Հնարավոր չէ դա պոկել և քննարկել ուրիշ բան»,- նշեց Նիկոլ Փաշինյանը:
