Վաշինգտոնում տեղի է ունենալու շատ կարևոր պատմական իրադարձություն. Սաակաշվիլի
Վրաստանի երրորդ նախագահ, մի շարք քրեական գործերով անցնող և անազատության մեջ գտնվող Միխեիլ Սաակաշվիլիի էջում նոր գրառում է հայտնվել տարածաշրջանային վերջին զարգացումների վերաբերյալ:
«Վաղը Վաշինգտոնում տեղի է ունենալու շատ կարևոր պատմական իրադարձություն։ Դոնալդ Թրամփի միջնորդությամբ Հայաստանը և Ադրբեջանը կստորագրեն խաղաղության պայմանագիր։
Ալիևն ու Փաշինյանը երկար ժամանակ խոսում էին, բայց ամեն ինչ արագացավ Ամերիկայի նախագահի միջամտությամբ։
Այդ օրը համաշխարհային պատմության մեջ կմնա որպես Կովկասի ազատագրման ամսաթիվ Ռուսաստանի ճիրաններից»,- գրել է Սաակաշվիլին:
Նա հավելել է, որ Ռուսաստանն արդեն պաշտոնապես կորցնում է Հարավային Կովկասի երեք երկրներից երկուսի նկատմամբ գերիշխանությունը:
Ըստ Սաակաշվիլիի՝ ՌԴ-ն առայժմ պահպանում է Վրաստանի նկատմամբ վերահսկողությունը «խամաճիկ ռեժիմի» միջոցով, բայց այդ վերահսկողությունը, անկասկած, երկար չի տևի:
Ինչպես հայտնել ենք՝ օգոստոսի 7-8-ը Հայաստանի Հանրապետության վարչապետ Նիկոլ Փաշինյանը այց կկատարի Ամերիկայի Միացյալ Նահանգներ։
Վաշինգտոնում վարչապետ Փաշինյանը երկկողմ հանդիպում կունենա Ամերիկայի Միացյալ Նահանգների նախագահ Դոնալդ Թրամփի հետ՝ Հայաստան-ԱՄՆ ռազմավարական գործընկերությունը խորացնելու նպատակով, ինչպես նաև եռակողմ հանդիպում՝ ԱՄՆ նախագահ Դոնալդ Թրամփի և Ադրբեջանի նախագահ Իլհամ Ալիևի հետ՝ միտված տարածաշրջանում խաղաղության, բարօրության և տնտեսական համագործակցության առաջմղմանը։
