Ֆրանսիան պաշտոնապես ճանաչեց Պաղեստինի պետությունը
Ֆրանսիայի նախագահ Էմանուել Մակրոնը հայտարարել է Փարիզի կողմից Պաղեստինի պետականության ճանաչման մասին։«Այսօր ես հայտարարում եմ Ֆրանսիայի կողմից Պաղեստինի պետության ճանաչման մասին»,- ասել է նա՝ Նյու Յորքում ՄԱԿ-ի կենտրոնակայանում տեղի ունեցող` պաղեստինյան հարցի վերաբերյալ կոնֆերանսում։
ՏԱՍՍ-ի թղթակցի փոխանցմամբ՝ Մակրոնի խոսքերը որոտալից ծափահարություններով են ընդունել Պաղեստինին աջակցող երկրների ներկայացուցիչները։
«Իսրայելի կողմից Գազայում ռազմական գործողությունների շարունակման համար որևէ արդարացում չկա: Ժամանակն է դադարեցնել պատերազմը»,- հայտարարել է Մակրոնը։
Ֆրանսիայի ղեկավարի խոսքով՝ Փարիզի կողմից Պաղեստինի ճանաչումը «կբացի ճանապարհը իսրայելցիների և պաղեստինցիների միջև բանակցությունների համար։
«Խաղաղության հնարավորություն կա: Մենք բոլորս պետք է աշխատենք խաղաղության մեխանիզմները գործի դնելու համար»,- ասել է նա։
