Վրաստանում հրաժեշտ են տալիս համայն Վրաստանի կաթողիկոս-պատրիարք Իլյա II-ին (լուսանկարներ)

Վրաստանում հրաժեշտ են տալիս համայն Վրաստանի կաթողիկոս-պատրիարք Իլյա II-ին։

Հոգեհանգստի արարողությունը սկսվել է Պատրիարքարանի Սուրբ Երրորդություն եկեղեցում:

Կաթողիկոս-պատրիարքը մահացել էր մարտի 17-ին, հաջորդ օրը նրա դագաղը տեղափոխվել է Սուրբ Երրորդություն եկեղեցի, որտեղ բոլորը կարող էին վերջին հրաժեշտը տալ ազգի հոգևոր առաջնորդին։

Պատարագը մատուցում է Համայն Վրաստանի պատրիարքական գահի տեղապահ, Սենակիի և Չխորոցկու միտրոպոլիտ Շիոն (Մուջիրի):

Հավատացյալները կարող են հետևել պատարագին ինչպես եկեղեցու մոտ, այնպես էլ ամբողջ քաղաքում տեղադրված էկրանների միջոցով։

Հուղարկավորության օրը Թբիլիսիի կենտրոնում հավաքվել էին հարյուր հազարավոր հավատացյալներ մայրաքաղաքից և երկրի այլ շրջաններից: Քաղաքի կենտրոնն ամբողջությամբ փակ է երթևեկության համար։

Եկեղեցի է ժամանել Կոստանդնուպոլսի ուղղափառ եկեղեցու Տիեզերական պատրիարք Բարթողոմեոս I-ը:

Նա, Պատրիարքական գահի տեղապահ, մետրոպոլիտ Շիոյի և վրաց եկեղեցու Սուրբ Սինոդի անդամների հետ միասին, կկատարի Իլիա II-ի հուղարկավորության արարողությունը:

Ժամը 15:00-ին Համայն Վրաստանի կաթողիկոս-պատրիարք Իլիա II-ի մարմինը Սամեբա տաճարից ոտքով տեղափոխվել  է Սիոնի տաճար:

Ճանապարհի երկայնքով կազմակերպվել է մարդկային միջանցք, որպեսզի հավատացյալները կարողանան ուղեկցել կաթողիկոս-պատրիարքին նրա վերջին ճանապարհորդության ժամանակ:

Տիեզերական պատրիարքից բացի, Վրաստան են ժամանել ուղղափառ եկեղեցիների մեծ մասի ներկայացուցիչները:

Ռուսական ուղղափառ եկեղեցու 80 հոգանոց պատվիրակությունը գլխավորում է Համայն Բելառուսի պատրիարքական էկզարխ, մետրոպոլիտ Բենիամինը (Տուպեկո): Երուսաղեմի ուղղափառ եկեղեցին գլխավորում է Կոստանդնուպոլսի Երուսաղեմի պատրիարքության էկզարխ, Ադրիանոպոլիսի արքեպիսկոպոս Նեկտարիոսը:

Վատիկանի պատվիրակությունը, Ալեքսանդրիայի ուղղափառ եկեղեցու պատվիրակությունը և նաև տարբեր երկրներից պատվիրակություններ են ժամանել Վրաստան:

Ամենայն Վրաստանի կաթողիկոս-պատրիարքը կթաղվի Սիոնի տաճարի հյուսիսային մասում, խորանի ձախ կողմում:

Հուղարկավորության ժամանակ Մցխեթա-Թբիլիսիի թեմի բոլոր եկեղեցիներում կհնչեն զանգեր։ Հուղարկավորությանը կմասնակցեն միայն հոգևորականներ։ Հավատացյալները կկարողանան մտնել Սիոնի եկեղեցի արդեն մարտի 23-ին։