Շիրակի մարզում գրանցված ավտովթարի հետևանքով տուժել է 11 մարդ, մահացել է 6-ը. ԱՆ-ն մանրամասներ է հայտնել
ՀՀ առողջապահության նախարարությունը մանրամասներ է հայտնել Շիրակի մարզում տեղի ունեցած ողբերգական ավտովթարից:
«Շիրակի մարզի Աղին բնակավայրի մոտակայքում տեղի ունեցած վթարի հետևանքով տուժել է 11 քաղաքացի:
Հանրապետական շտապօգնության ծառայության միջոցով 5 երեխա հոսպիտալացվել է, որոնցից երկուսի կյանքը, ցավոք, փրկել չի հաջողվել:
Կազմակերպվում է տուժած 3 երեխայի տեղափոխումը երևանյան բուժհաստատություն:
Մյուս տուժածների առողջական վիճակը գնահատվում է ծանր և ծայրահեղ ծանր: Գտնվում են վերակենդանացման բաժանմունքում:
Պատահարից գրանցվել է 6 քաղաքացու մահ»,- ասվում է նախարարության հաղորդագրության մեջ:
Ինչպես հայտնել էինք, ապրիլի 10-ին խոշոր ու ողբերգական ավտովթար է տեղի ունեցել Շիրակի մարզում։
ՀՀ ՆԳՆ փրկարար ծառայությունը հայտնել էր, որ բախվել են BMW և «Օպել» մակնիշների ավտոմեքենաները, հիվանդանոց տեղափոխված 3 տուժածները երեխաներ են:
