Իսրայելի քաղաքականությունը սպառնալիք է դարձել Թուրքիայի ազգային անվտանգության համար․ Էրդողան
Մերձավոր Արևելքում Իսրայելի վարած քաղաքականությունը վերածվել է Թուրքիայի ազգային անվտանգության համար սպառնալիքի գործոնի։
Այս մասին հայտարարել է Թուրքիայի նախագահ Ռեջեփ Թայիփ Էրդողանը։
Թուրքիայի նախագահը քննադատել է Իսրայելի վարչապետ Բենիամին Նեթանյահուի կառավարությանը՝ Սիրիայում և Լիբանանում իրականացվող գործողությունների համար։
«Նեթանյահուն և նրա հանցավոր ցանցն իրենց հարձակումներով Սիրիայի և Լիբանանի դեմ իրավիճակը հասցրել են այնպիսի կետի, երբ այն արդեն սպառնալիք է ներկայացնում նաև Թուրքիայի համար։
Սիրիան և Լիբանանը երկու անկախ պետություններ են, սակայն միևնույն ժամանակ մեր սիրո և եղբայրության աշխարհագրության մասն են։ Դամասկոսն ու Բեյրութը Ստամբուլի եղբայր քաղաքներն են։ Թուրքիայի անվտանգությունը սկսվում է ոչ միայն Հաթայից, այլև Հալեպից, Դամասկոսից և Բեյրութից»,- հայտարարել է Էրդողանը։
Թուրքիայի նախագահը նաև մեղադրել է Իսրայելին Լիբանանում ռազմական գործողությունները շարունակելու և լիբանանյան տարածքից զորքերը դուրս բերելուց հրաժարվելու մեջ։ Նրա խոսքով՝ իսրայելական կողմի գործողությունները նպաստում են տարածաշրջանում իրավիճակի հետագա ապակայունացմանը։
