Ի՞նչ իրավական հիմքով են հանձնվել Շուռնուխի, Կիրանցի հատվածներում ՀՀ–ի իրավազորության տակ գտնվող տարածքները․ Արծվիկ Միասյան
Ինչ իրավական հիմքով են հանձնվել Շուռնուխի, Կիրանցի հատվածներում Հայաստանի իրավազորության տակ գտնվող տարածքները. Եթե չկա այդպիսի իրավական հիմք, հիմո նոր այս կանոնակարգով է ստեղծվում այդ հիմքը, ապա ձեր գործողությունն ինչպես կբնութագրեք՝ հանցագործությո՞ւն, ապաշնորհությո՞ւն: Այս մասին, այսօր՝ հոկտեմբերի 2-ին, ԱԺ-ում հարցուպատասխանի ժամանակ դիմելով ՀՀ վարչապետ Նիկոլ Փաշինյանին, ասաց «Հայաստան» խմբակցության քարտուղար Արծվիկ Մինասյանը:
«Երկրորդ, եթե նոր է ստեղծվում իրավական հիմքը, հնարավո՞ր է, որ նոր տարածքներ հանձնվեն թշնամուն: Հիշեցնեմ, որ միայն ձեր ժամանակահատվածում է, որ խոսում ենք Հայաստանի ինքնիշխան իրավազորության տակ գտնվող տարածքների հանձնման մասին»,-ասաց նա:
ԱԺ նախագահ Ալեն ՍԻմոնյանն արձագանքեց. «Նախ եկեք արձանագրենք, որ ՀՀ ինքնիշխան տարածքից որեւէ մեկը երբեւէ տարածք չի հանձնել, եթե չանդրադառնանք 1920 թվականին, երբ ՀՅԴ-ն ամբողջ Հայաստանի Հանրապետությունը հանձնեց: Ձեր ստեղծած իրականության մեջ մի ապրեք»:
Ապա նա ամբիոնի մոտ հրավիրեց վարչապետ Նիկոլ Փաշինյանը: Վերջինս նշեց. «Ես իմ անձնական որոշմամն այդ հնարավորությունը տվել եմ, որ դուք ծանոթանաք այդ թղթերին (նկատի ունի խաղաղության պայմանագրի նախագիծը-խմբ): Դուք էդ թղթերին ծանոթացել եք, հետո իրականության հետ կապ չունեցող, սոցիալական ցանցերում ինչ-որ գրառումներ եք արել, ձեր քաղաքական նպատակներով շահարկել, ես էլ արգելել եմ: Լավ եմ արել: Որովհետեւ, դուք գնաք տեքստը կարդաք, հետոգաք դրա մասին հեքիաթներ պատմեք, մենք էլ սենց սուս ու փուս նստե՞նք: Ո՞րն է այդտեղ տրամաբանությունը:
Ես այդ հնարավորությունը տվել եմ, որ դուք որպես պատգամավորներ, ծանոթ լինեք պրոցեսին: Ավելին ասեմ, երեւի ՔՊ-ից շատ պատգամավորներ ծանոթ չեն այդ տեքստին, չեն կարդացել, չնայած ես իրենց հետ հանդիպումներին ամբողջ տեղեկատվությունը ներկայացնում եմ: Հիմա դատի եք տվել, լավ եք արել, դատարանը թող որոշի: Մենք էլ մեր դիրքավորումը կունենանք դրան»:
Փաշինյանի խոսքով, այո, ՀՀ տարածքներից ավելի քան 200 քկմ տարածք օկուպացված է, բայց նաեւ ասում ենք, որ ռազմական ճանապարհով դրանք վերադարձնելու խնդիրն չենք դնում, քանի որ այդ կանոնակարգը ստեղծում է հնարավորություն, որ իրավական, դիվանագիտական, բանակցային ճանապարհով այդ խնդիրը լուծվի:
Անդրադառնալով նրան, որ Կիրանցի եւ Շուռնուխի մի շարք բնակիչներ անգամ սեփականության վկայականներ են ունեցել, սակայն այդ տարածքները տրվել են Ադրբեջանին, վարչապետն ասաց. «Մենք ասել ենք, որ պետք է հասկանանք, թե ինչ հիմքեր ունեն այդ սեփականության վկայականները: Մենք այդ հիմքերը չենք գտել, եւ այդ սեփականության գնահատականներ տալու առիթը ուղարկված է իրավապահ մարմիններին, թե ոնց է, որ իրավական հիմքը չկա, բայց վկայականը կա:
Ինչ վերաբերում է նրանո, որ իմ որոշմամբ է արգելվել, այո, այս երկրում շատ բան է տեղի ունենում իմ որոշմամբ, քանի որ ես երկրի վարչապետն եմ: Բոլոր հիմքերը կան»:
