Դաշնակցային հարաբերություններն այսուհետ եվս հաջողությամբ կզարգանան․ Պուտինը զանգահարել է Ալիեվին
Ռուսաստանի նախագահ Վլադիմիր Պուտինը զանգահարել է Իլհամ Ալիևին, շնորհավորել ծննդյան օրվա առթիվ:
Այս մասին հայտնում են Ադրբեջանի նախագահի գրասենյակից։
Նշվում է, որ հեռախոսազրույցի ընթացքում կողմերը վստահություն են հայտնել, որ երկու երկրների «ռազմավարական գործընկերությունը և դաշնակցային հարաբերություններն այսուհետ ևս հաջողությամբ կզարգանան»:
Մտքեր են փոխանակվել համագործակցության հեռանկարների շուրջ:
Ավելի վաղ Կրեմլի մամուլի ծառայությունից տեղեկացրել էին, որ Պուտինն ընդգծել է Ալիևի «անձնական ներդրումը երկու պետությունների միջև ռազմավարական գործընկերության և դաշնակցային հարաբերությունների կառուցման ու ամրապնդման գործում»:
«Ձեր ղեկավարությամբ բարեկամ Ադրբեջանը վստահորեն շարժվում է սոցիալ-տնտեսական զարգացման ճանապարհով, ամրապնդում է իր դիրքերը համաշխարհային ասպարեզում»,- նշել է ՌԴ ղեկավարը:
