Ինչ է լինելու, եթե ՍԴ-ն հակասահմանադրական ճանաչի ապօրինի գույքի բռնագանձման օրենքը. Գալյանի պարզաբանումը (տեսանյութ)
Ճիշտ եք, Սահմանադրական դատարանում կա վարույթ, որի շրջանակներում քննարկվում է ապօրինի ծագում ունեցող գույքի բռնագանձման մասին օրենքի սահմանադրականության հարցը. թե ինչ կասի Սահմանադրական դատարանը, մենք ուղղակի պետք է սպասենք և տեսնենք։
Այս մասին այսօր՝ դեկտեմբերի 27-ին, կառավարության նիստից հետո լրագրողների հետ զրույցում նշեց ՀՀ արդարադդատության նախարար Սրբուհի Գալյանը:
Հարցին՝ եթե Սահմանադրական դատարանը համարի, որ հակասահմանադրական է այն օրենքը, որով դուք, մարդկանց գույքը համարել եք ապօրինի և բռնագանձել եք, ի՞նչ է տեղի ունենալու, Գալյանը պատասխանեց.
«Կոնկրետ ես գույքը չեմ համարել ապօրինի, ապօրինի համարել է դատարանը և որոշ դեպքերում նաև համաձայնություն է տվել կողմը և կնքել է հաշտություն:
Այսինքն Պողոս Պողոսյանը ինքը համաձայնում է որ իր գույքը ապօրինի է և հաշտություն է կնքում դատախազության հետ:
Հաշտության համաձայնությունները չեն կարող վիճարկվել, դրանք վերջնական են, Ութ դեպքերում կնքվել են հաշտության համաձայնություններ և այս առումով վիճարկումներ բացարձակ չկան:
Սահմանադրական դատարանը, եթե որևէ նորմ սահմանի Սահմանադրությանը հակասող և անվավեր, ապա, իհարկե, պետք է մենք բացառենք այդ նորմի գոյության հնարավորությունը: Դա, իհարկե, կարող է բերել հետևանքների:
Գուցեև անհրաժեշտություն առաջանա որոշակի գործեր վերանայելու, կախված նրանից, թե ինչ կասի Սահմանադրական դատարանը»:
