Սաուդյան թագաժառանգը ֆանտաստիկ տղա է, նրան կխնդրեմ ԱՄՆ-ում ներդրումների թիվը կլորացնել ու հասցնել 1 տրլն դոլարի. Թրամփ
ԱՄՆ նորընտիր նախագահ Դոնալդ Թրամփը Սաուդյան Արաբիային առաջարկել է հայտարարված 600 մլրդ դոլարի փոխարեն 1 տրիլիոն դոլար ներդնել ԱՄՆ տնտեսությունում, գրում է cnbc.com-ը:
«Այսօր թերթերում կարդացել եմ, որ Սաուդյան Արաբիան առնվազն 600 մլրդ դոլարի ներդրում է անելու Ամերիկայում: Բայց ես թագաժառանգ արքայազնին, որը ֆանտաստիկ տղա է, կխնդրեմ այդ թիվը կլորացնել ու հասցնել 1 տրիլիոն դոլարի:
Կարծում եմ՝ նրանք կանեն դա, քանի որ մենք շատ լավ ենք վերաբերվել նրանց», — ասել է ԱՄՆ նախագահը Դավոսում Համաշխարհային տնտեսական համաժողովի շրջանակում տեսակապի միջոցով իր ելույթում:
Նախօրեին հաղորդվել էր, որ Սաուդյան Արաբիայի թագաժառանգ Մուհամեդ բեն Սալմանն ասել է, որ թագավորությունը ցանկանում է 600 միլիարդ դոլար ներդնել ԱՄՆ-ում առաջիկա չորս տարվա ընթացքում:
«Թագաժառանգը հաստատել է թագավորության մտադրությունը՝ ընդլայնել ներդրումներն ու առևտուրը Միացյալ Նահանգների հետ առաջիկա չորս տարիների ընթացքում՝ մինչև 600 միլիարդ դոլար և, հնարավոր է, ավելին», — ասվում է հայտարարության մեջ:
Երկուշաբթի իր երդմնակալությունից հետո Թրամփն ասել էր, որ հնարավոր է Սաուդյան Արաբիա կատարի իր առաջին արտասահմանյան այցը, ինչպես դա արել էր 2017 թվականին:
«Առաջին արտասահմանյան ուղևորությունը (ԱՄՆ նախագահի-Խմբ.) սովորաբար Մեծ Բրիտանիա էր, բայց վերջին անգամ ես այն կատարեցի Սաուդյան Արաբիա, քանի որ նրանք համաձայնեցին գնել 450 միլիարդ դոլարի մեր արտադրանքը:
Եթե Սաուդյան Արաբիան ցանկանար գնել ևս 450 կամ 500 միլիարդ դոլարի արտադրանք… կարծում եմ՝ հավանաբար կգնայի», — ասել է Թրամփը լրագրողներին Օվալաձև աշխատասենյակում:
