Ադրբեջանը խաղաղության այդ պայմանագիրը ձգձգելով փորձում է ՀՀ-ի նկատմամբ ճնշումներ սկսել․ Օհանյան
Հայաստանի իշխանություններն Ադրբեջանի հետ հարաբերություններ ձևավորելու մեջ գտնվում են ճնշումների և պարտադրության ներքո:
Այս մասին լրագրողների հետ զրույցում նշեց ԱԺ «Հայաստան» խմբակցության պատգամավոր Սեյրան Օհանյանը:
«Ճիշտ է, որ պետք է գնալ խաղաղության, մենք էլ ենք ձգտում խաղաղության, բայց Ադրբեջանի կողմից դա խաբկանք է, որովհետև իրենք խաղաղության պայմանագրի մեջ այնպիսի կետեր են դրել, որոնք ցույց են տալիս, որ անընդհատ շարունակական ճնշումներ կան Հայաստանի նկատմամբ՝ նոր պահանջներ ներկայացնելով:
Առավել ևս, երբ դրանք զուգորդվում են նաև կրակոցներով սահմանին, ցույց են տալիս, որ իրական չէ խաղաղությունը:
Երբ խոսում ենք Հայաստանի իշխանությունների վարքագծի մասին, մենք տեսնում ենք, որ նրանք ամեն գնով ուզում են ստանալ այդ փաստաթուղթը, շատ դեպքերում ասում են այդ թղթի կտորը, որպեսզի իրենք դա օգտագործեն ներքաղաքական գործընթացներում:
Իսկ Ադրբեջանը խաղաղության այդ պայմանագիրը ձգձգելով փորձում է միջազգային իրավական հիմքեր ստեղծել, հետագայում օգտվելով աշխարհաքաղաքական զարգացումներից, ուժային կենտրոնների միջև հարաբերություններից, ՀՀ-ի նկատմամբ ճնշումներ սկսելու, հնարավորության դեպքում նաեւ միջանցք բացելու համար»,-ասաց նա:
