Կուզենայի կարդալ դիտարկումներ Արտաշատի ԲԿ-ի փոփոխությունների մասով, այն ինձ համար շատ կարևոր է. Ավանեսյան
ՀՀ առողջապահության նախարար Անահիտ Ավանեսյանը չնախատեսված այցով եղել է Արտաշատի ԲԿ-ում:
Այս մասին սոցցանցի իր էջում հայտնում է նախարարը՝ տեղեկացնելով, որ կենտրոնը համալրվել է նոր և ժամանակակից համակարգչային շերտագրման (ՀՇ) սարքով:
«Մի քանի ամիսների հետևողական աշխատանքի շնորհիվ ֆինանսական առողջացումը հաջողությամբ իրականանում է:
Դեռ մեծ աշխատանք ունենք նոր ծառայություններով հագեցման, որակի և դիսցիպլինի, թերապևտիկ ուղղությունից դեպի վիրաբուժության անցման և մահճակալային ֆոնդի արդյունավետ օգտագործման առումով, որը վստահաբար իրականացնելու ենք:
Բարեխիղճ և հետևողական աշխատանքը չի կարող պտուղ չտալ:
Կուզենայի նաև կարդալ Ձեր դիտարկումները կենտրոնի փոփոխությունների մասով. այն ինձ համար շատ կարևոր է»,- գրում է նախարարը:
