Ստամբուլի համալսարանը չեղարկել է Էքրեմ Իմամօղլուի մագիստրոսական դիպլոմը
Ստամբուլի համալսարանը չեղարկել է բանտարկված ընդդիմադիր քաղաքապետ Էքրեմ Իմամօղլուի մագիստրոսական դիպլոմը՝ փաստաթղթերի կեղծման մեղադրանքների հետ կապված նրա բակալավրիական դիպլոմի չեղարկման պատճառով:
Իմամօղլուի տվյալները կհեռացվեն Ստամբուլի համալսարանի ակադեմիական գրանցման և Բարձրագույն կրթության տեղեկատվական համակարգերից, իսկ նրա մագիստրոսական աշխատանքը՝ թեզիսների ազգային կենտրոնից:
Այս գործով դատական նիստը նշանակված Է սեպտեմբերի 11-ին։ Դատախազը պահանջել է 8 տարի 9 ամիս ազատազրկում:
Ավելի վաղ Ստամբուլի դատարանը դատավճիռ է կայացրել Իմամօղլուի նկատմամբ՝ տեղի դատախազին վիրավորելու մեղադրանքով: Նա դատապարտվել է 1 տարի 8 ամիս ազատազրկման։
Իմամօղլուն ձերբակալվել էր դեռ մարտին: Նա մեղադրվում է նաև կոռուպցիայի, փողերի լվացման և ահաբեկչության հետ կապ ունենալու համար։
Իմամօղլուն չի ընդունել առաջադրված մեղադրանքները՝ դրանք համարելով քաղաքական հետապնդում: Նա համարվում է նախագահի առաջիկա ընտրությունում Ռեջեփ Էրդողանի հիմնական մրցակիցը:
