Ուիթքոֆը ժամանել է Մոսկվա. նրան դիմավորել է Պուտինի հատուկ ներկայացուցիչը

Ռուսաստանի ուղղակի ներդրումների հիմնադրամի ղեկավար, Ռուսաստանի նախագահի արտասահմանյան երկրների հետ տնտեսական համագործակցության հարցերով հատուկ ներկայացուցիչ Կիրիլ Դմիտրիևը Վնուկովո օդանավակայանում դիմավորել է ԱՄՆ նախագահի հատուկ դեսպանորդ Սթիվեն Վիտկոֆին, հայտնում է ՏԱՍՍ-ը՝ հղում անելով աղբյուրին։

Վիտկոֆը վերջին անգամ Մոսկվա էր եկել բանակցությունների ապրիլի 25-ին, իսկ դրանից առաջ՝ ապրիլի 11-ին, Սանկտ Պետերբուրգ։ Երկու անգամ էլ նրա հետ հանդիպումներ է ունեցել Ռուսաստանի նախագահ Վլադիմիր Պուտինը։ Սա Վիտկոֆի հինգերորդ այցն է Ռուսաստան տարեսկզբից ի վեր։

Ավելի վաղ ԱՄՆ նախագահ Դոնալդ Թրամփը հայտարարել էր, որ կարող է օգոստոսի 9-ին պատժամիջոցներ կիրառել Ռուսաստանի նկատմամբ, եթե մինչ այդ պահը չհաջողվի հասնել ուկրաինական ճգնաժամի կարգավորմանը։

Միաժամանակ նա նշեց, որ Ռուսաստանը լավ է հաղթահարում պատժամիջոցները։ Հարցին, թե արդյոք Ռուսաստանը կարող է խուսափել ԱՄՆ ներկայիս վարչակազմի պատժամիջոցներից, Թրամփը պատասխանեց, որ դրա համար «պետք է կնքվի մի գործարք, որը կկանխի մարդկանց մահը»։

Հուլիսի 14-ին Թրամփը հայտարարեց, որ Միացյալ Նահանգները Ռուսաստանի և նրա առևտրային գործընկերների վրա կսահմանի մոտ 100% ներմուծման մաքսատուրքեր, եթե Մոսկվան և Վաշինգտոնը 50 օրվա ընթացքում համաձայնության չգան Ուկրաինայի հարցի կարգավորման շուրջ: Հուլիսի 29-ին Թրամփը հայտարարեց, որ որոշել է կրճատել այս ժամկետը մինչև 10 օր:

Օգոստոսի 5-ին Թրամփը նշեց, որ Միացյալ Նահանգները հետագայում կորոշի՝ սահմանե՞լ վերոնշյալ ներմուծման մաքսատուրքերը, թե՞ ոչ։ Նրա խոսքով՝ Միացյալ Նահանգների հետագա քայլերը կախված կլինեն իր հատուկ դեսպանորդ Սթիվեն Վիտկոֆի՝ Մոսկվայում կայանալիք բանակցությունների արդյունքից։