Հայաստան-Թուրքիա հարաբերությունների կարգավորման գործընթացը փակ սահմանի բացման և հայ-թուրքական դիվանագիտական հարաբերությունների հաստատան մասին է. Ռուբինյան
Ազգային ժողովի փոխնախագահ, Հայաստան-Թուրքիա հարաբերությունների կարգավորման հատուկ ներկայացուցիչ Ռուբեն Ռուբինյանը հայտարարել է, որ մոտ օրերս Երևանում կկայանա իր և Թուրքիայի հատուկ ներկայացուցիչ Սերդար Քըլըչի հանդիպումը։
Նրա խոսքով՝ քննարկվելու է հարաբերությունների կարգավորման ամբողջ օրակարգը․ «Կխոսենք ինչպես այն քայլերի մասին, որոնք արդեն արվել են, այնպես էլ դրանց մասին, որոնք դեռ ընթացքի մեջ են։
Մեր վերջին հանդիպումից հետո քննարկումներ եղան Կարս–Գյումրի երկաթգծի վերականգնման համար անհրաժեշտ տեխնիկական պարամետրերի շուրջ»,– նշեց Ռուբինյանը։
Փոխնախագահը հավելեց, որ օրակարգում տեղ է գտել նաև Անիի պատմական կամրջի վերականգնման թեման։ «Բայց գլխավոր և համընդհանուր հարցը, բնականաբար, հայ–թուրքական հարաբերությունների կարգավորումն է»,– ընդգծեց նա։
«Հայաստան-Թուրքիա հարաբերությունների կարգավորման գործընթացը փակ սահմանի բացման և հայ-թուրքական դիվանագիտական հարաբերությունների հաստատան մասին է, բնականաբար երկկողմ քննարկումները հենց սրա մասին են»,- ասել է Ռուբեն Ռուբինյանը, պատասխանելով այն հարցին, թե Սերդար Քըլըչի հետ հանդիպման ժամանակ սահմանների բացման մասին խոսվելո՞ւ է:
