Իսկ ո՞վ է հիմա խոսում պատմական Հայաստանից, ինչպե՞ս կարելի է էսքան խաբել ժողովրդին. Մենուա Սողոմոնյանը՝ Շիրակ Թորոսյանին
Լրահոսին չտիրապետող ու ԱԺ ՔՊ խմբակցության (նախկինում՝ ԱԺ ՀՀԿ խմբակցության) պատգամավոր Շիրակ Թորոսյանի ելույթը լսող մարդկանց մոտ կարող է տպավորություն ստեղծվել, իբր հիմա ողջ ընդդիմադիր դաշտը պատմական Հայաստան է պահանջում՝ Մուշ, Վան, Խոյ, Սալմաստ, Ախալքալաք ու Ախալցխա:
Այս մասին իր էջում գրել է ԵՊՀ նախկին դասախոս, «Հայաքվե» նախաձեռնության անդամ Մենուա Սողոմոնյանը՝ արձագանքելով նախօրեին խորհրդարանում ՔՊ-ական պատգամավոր Շիրակ Թորոսյանի հայտարարություններին:
Նա, մասնավորապես, նշել է. «Իր անփառունակ շեֆի կեղծ ու անհիմն խոսույթը անպատեհ շրջանառող պատգամավորին, ով նաև դասախոս է աշխատում Մայր բուհում, չարժե՞, որ ուսանողները հարցնեն՝ իսկ ո՞վ է հիմա խոսում պատմական Հայաստանից, քաղաքական ո՞ր ուժերն են, քաղաքական ո՞ր գործիչներն են նման հարցեր բարձրացնում…
Ինչպե՞ս կարելի է էսքան խաբել, մոլորեցնել ժողովրդին, ինչպե՞ս:
Երբվանի՞ց 150.000 փախստական մարդու տուն դառնալու հարցը, ռազմագերիներին ու պատանդներին վերադարձնելու հարցը, սահմանազատման անվան տակ նորանոր տարածքներ թշնամուն չնվիրելու հարցը, աշխատելու փոխարեն չփիառվելու հարցը դարձան պատմական Հայաստանի պահանջներ»։
