Դեռ համաձայնություն չունենք. Միրզոյանը՝ Ադրբեջանի կողմից բարձրաձայնված Սահմանադրության հետ կապված հարցի մասին
Հանրային հեռուստատեսությանը տված հարցազրույցում ՀՀ ԱԳ նախարար Արարատ Միրզոյանն անդրադարձել է հայ-ադրբեջանական բանակցային գործընթացի ներկայիս փուլին՝ հստակեցնելով, թե ինչու մինչև այժմ խաղաղության պայմանագիրը չի ստորագրվել։
Նախարարը փաստել է, որ պայմանագրի բովանդակային մասի վրա աշխատանքներն ավարտված են, և տեքստը նախաստորագրվել էր դեռևս օգոստոսին։
«Գործընթացն առաջ գնալու համար այս պահին բան չկա։ Կա՛մ մենք պայմանավորվում ենք՝ երբ և որտեղ ենք ստորագրում, կա՛մ չենք պայմանավորվում, դեռ չենք պայմանավորվել։
Եվ տեքստը, հիշում եք, դեռ մարտին համաձայնեցվել էր, օգոստոսին՝ նախաստորագրվել, սրա վրա այլևս աշխատանք չկա անելու»,- ասել է Միրզոյանը:
Ըստ նրա՝ հիմնական տարաձայնությունը վերաբերում է Ադրբեջանի կողմից բարձրացվող ՀՀ Սահմանադրության փոփոխության պահանջին, ինչը հայկական կողմի համար ընդունելի չէ։
